إنتثار الدّمع والشّهْقه دوام = واحْتدامات العباير لي سِمه
وانْكسار الخاطر اصْبح لي لِزام = والهموم امْست لقلبي محْزمه
ياحروف الشّعر ياعذْب الكلام = صوّروا حالٍ غثاها لمْلمه
قولوا انّ الكون في عيني ظلاام = والحظوظ امْست بحقّي مجْرمه
والفجوج الواسعه والله حرام = ضاقت بعيني وجادت باسْقمه
من كِسِرْ عظمي من صروفٍ عِظام= انهكتْني في طعونٍ محْكمه
وآخر الضّربات تمزيع الحزام = حطّمتْه وعشت بعْده مأْتمه
راح عضدي راح تاجي والوسام = مابقى ياكود رشْقه من دمه
شفتها فيما تبقّى من حطام= صوّره نزّاع روحه وارْسمه
معْ ((دليل الوقت)) واسْطورٍ كِرام= أدْعيه للّي وعوده تمّمه
هي بقايا (الليل ) هي مسْك الختام= هي عناوينٍ لحزني وارْقمه
يارحيم وياودود وياسلام= ياحكيم ويامعلّي أنْجمه
خالقي يافارض لحجّ وصِيام= غافر الزّلات يامْدير انْسمه
تبْ على تركي وبلّغْه المرام= وانْزِله جنّات خلْدٍ واكْرمه
واجْمعنْ ويّاه في اغلى مقام= خالقي واسْألْك تركي ترحمه

.
.

يادمعة احزاني رجا لاتوقفي= لازال جرح فْراق تركي ينزفا
لازلت اردّد وانْدهه متْلهّفي=وتْجاوب اصواتي بيوتٍ واحرفا
ارجع لنبْضه كلّ يومٍ وانكفي= من بعْد مابْكي لين دمعي ينشفا
تركي بعدْه الحال صعبٍ توصفي= مانْسى لموقف فيه قلبي ارْجفا
يوم انهم شالوه فوق الاكتفي= واوروه في قبره بكيتك يالوفا
تركي محال انساه لين اتلحّفي= باكفاني ونعْشي تعلا الاكْتفا
لا لا تلوموني اذا قلت احْتفي= قرّب واحسّه قدْم عيني شرّفا
لنّي احس بموتته كلّ كْلفي= وماعادت الدنيا بعد تركي صفا
أوّاه ياعيني سالتك تذرفي= هلّي وهلّي طفّي لنار الخفا
يالله طلبتك رافعٍ لك اكْففي= طيّب ثراه وثبّته بالموقفا

.
.

جيت الوجار اللي غذا عِزّه الليل =مابين لجّينٍ بعقده ينوحي
قال اهْتويت متعّب البنّ والهيل = وينه من شهورٍ تركني بروحي
وين الهدير ووين صفّ المعاميل = والعود ماعاده بجوّي يفوحي
هذا وانا جنْبه أطوح الولاويل = اشهق حزِنْ وانْدب ودمعي سفوحي
قلْت لمكان الليل هاك التفاصيل = الليل من فوقه نصايب تلوحي
الليل في درْب الشّفاح المشاميل = لقى النصيب وسال دمّه طفوحي
ولا بقى لي غير ويلٍ باثر ويل = لاشفْت تال الليل طاولْت نوحي
لاشفت جوّاله وتال المساميل = والساعة اللي في يساره تضوحي
واكْتيّبٍ بالمحفظه به تراتيل = والسّبْحة اللي فارقت للفروحي
هذاي من بعْده لحقْت المهابيل = واقفى الهنا عنّي وزادت تروحي
مالي جدا ياكود ليل ومقاييل = اسجّ بين (البازمين ) وجروحي
اعيد للذّكرى مع الليل واشيل = لاصوات حزْنٍ بعْد هدّت صروحي

.
.

خمس الاهلّه ماطفى حامي الفـوح=والنـوم غطّـاتٍ وكلّـه حلومـي
الحزن في قلبي له قصور واصروح=عيا يفارقنـي بصحـوي ونومـي
من سجّلوا لاسمه على صفحة اللوح=( تركي بطيات الكفون محزومـي)
وانا على بحرٍ من الحزن مطـروح=سلواي سجـاتٍ لغـال الرسومـي
اجي مكانه ظامي القلب مشفوح = واردّ واحزاني تعلّت هدومي
لاشفت لحروفٍ على العاير تْلوح = واللي بقى له من شخوط ورقومي

.
.

كلّ ماذعذع من الغربي هواه = قاد رجلي خافقٍ عيا يطيب
قمت ادوّج بين هاه وبين هاه = وآتذكر وين سجات الحبيب
قمت افتش بالشعيب اللي وطاه = وانشد اللّجّه وانا دمعي صبيب
ياشموخ الضلع عيني صبّ ماه= والحشا والله يحرّقْه اللّهيب
ماقويت اسلا الحبيب اللي خذاه = حكم منهو فوقنا دايم رقيب
يالجوجه تذكري صيغة دعاه= لاهدر ياحيّ ضيفه والنديب