أنا ومنيرة وزوجها الخروف !

19-08-2009, 05:38 PM

البارحة والنوم يداعب عيوني الجميلة الساعة 10 تقريبا :019111:

فجأة سمعت صوت أبو نورة يردد عبر الجوال )( والله واحشني زمانك )(

\

/

يوووووووه منو متصل بهالوقت ... خذيته ورديت ألو ...

وبسرعة البرق : مراحب غيود ... شلونج ... نايمة ؟

غيداء : منو شيوّم ؟ <<< دلع شيماء

شيماء : إيه شيوم ... وكملت من غير ما تعطيني فرصة أكمل باقي كلامي :shutup:

شيماء : هههههههههه غيود ... منيرة تزوجت

غيداء : منيرة منو ؟ :ggg:

شيماء : منيرة راعية الخروف

غيداء : منييييييييييييرة إييييييييييييه ... صج تزوجت ؟ وعسى خذت خروف ؟

شيماء : هههههههههه ايه ... إتصلت فيها أبارك لها وقالت تحقق حلمها والزوج يقولون عنه خروف

<<< باقي التفاصيل سوالف مالكم فيها :bleh:

\

/

المووووهم

منيرة هذي بنت جيران بيت خالتي عمرها ما يتجاوز 24 سنة ملامحها فيها غرور وعنجهية ومتشبعة باللعانة

التقيت فيها قبل تقريبا شهر أو أقل في حفلة عند خالتي بمناسبة شفاء ولدها الصغير من كسر في ساقه

كانت مع أمها وخواتها

جلسنا إحنا البنات لحالنا وطبعا ما تصير سوالف بنات إذا ماكو طاري للعرس والزواج :163:

\

/

قالت منيرة يومها : ماكو أحلى من إن الوحده تتزوج خروف

إنفجرت بالضحك بشكل هستيري :4606:

حتى طالعت فيني منيرة بنوع من الشفقة على جهلي البالغ بفوائد الخروف

وقالت : واضح إنج صغيرة وجاهلة وايد بالحياة :4608:

ولحظتها حركت في داخلي دافع الرغبة في التعرف عليها أكثر

قلت : الصج ما أنكر صغري وجهلي ولكن ترى أعجبج شطورة وأحب أتعلم:4611:

بس أعذريني أول مرة أعرف إن فيه زوج خروف :ggg:

قالت بالعكس فيه كثير خرفان وتقريبا هم أفضل الأنواع

قلت شلون أفضل ؟

قالت ببساطة : لا يهش ولا ينش ... تحركينه مثل الخاتم بإيدج ... لا يحاسبج ولا يسألج

قاطعتها وقلت : وعلى شنو يحاسبني ؟ ... فهمتني على طول

قالت : لا يروح بالج بعيد

قصدي الشغلات العادية بين الأزواج ... والأهم ما يقرفج بأمه وبلاوي أمه وخواته

وكملت منيرة تعدد محاسن ومزايا الزوج الخروف اللي تحلم فيه وتتمناه بشدة

وبعد ما انتهت سألتني ... ها شرايج الحين بالزواج من خروف ؟

قلت : الصج يا منيرة مواصفات عجييييييبة وأتمنى من كل قلبي تتزوجين خروف

لكن ديري بالج لا يتعشى فيج الذيب وخروفج يطالع :shutup:

ضحكوا البنات وتغيرت ملامح منيرة ونظراتها لي

قالت : يا ريت تثمنين كلمتج قبل ما تقولينها يا غيداء

قلت : كلمتي مثمنتها يا منيرة لكن اللي إدور الخروف وتأمن على نفسها وياه

ما أعتقد بيصعب على الذيب يتعشاها هي وخروفها بليلة وحده بعد

\

/

وقمنا للعشاء ونظرات منيرة لي كلها كره وحقد إلا إن رغبة الزواج من خروف ما تغيرت أبدا عندها

حتى تحقق حلمها بالزواج من خروووووف .. بس لابس غترة وعقال وثوب هههههههههههههه

\

/

والصج بعد ما تحقق حلم منيرة

أنا بصراحة أفكر أدور لي أسد ... وإذا ما حصلت بشوف لي ذيب :ggg:

خاصة إن منيرة قالت كل الأنواع اللي تبي البنت متوفرة

\

/

أعذروني على طول الموضوع لكن حاولت أخليكم بالصورة بشكل دقيق

مع إن أغلب التفاصيل سقطت من الذاكرة :4607:

19-08-2009, 10:43 PM

مساء الخير والاحساس والطيبة لاحلى غيداء طلعت عليها الشمس ..

ياحليلك يا منيرة ،، اجل خذت خروف ..؟؟

عليها بالعافية إن شاء الله ،، ومثل ما قال المثل الطيور على اشباهها تقع ..

وإلا فيه بنت عاقلة ترضى على نفسها انها تكون على ذمة خروف !!

ما يقدم ولا يأخر ولا يثبت رجولته قدامها إلا في الفراش بس ،، طبعا وبمزاجها بعد !!

كيف تحس بالأمان ،، وكيف تحس انه رجل وله شخصيته وكيانه ووجوده ،، كيف تحس انها في ضل رجل ومحكومة منه وهذا احساس تحبه الأنثى رغم تمردها عليه احيانا ..!!

مايهم هذا كله في داهيه خلونا نقول البنت تبي كذا الله يوفقها ويهنيها ويسعدها ....

لكن الرجل كيف يرضى على نفسه انه يكون خروف ،، تسحبه وراها ويمشي على هواها بس ..؟؟

وين رجولتك وين عزة الرجل في نفسك ؟؟

كيف تملى عينها وكيف تملى قلبها وانت مجرد تابع ضعيف لرغباتها ومنفذ لطلباتها بس .

والمهم في المسألة يا غيداء أن هي اللي بتندم بكره ،، هي اللي بتفقد الرجل الحقيقي في حياتها وبتكون حياتها الزوجية معتمدة على مجرد رجل يقضي طلباتها ورغباتها بدون أي احساس برجولته وكيانه وشموخه وعزته ..

واقسم بالله أن هذا مصدر تعاسه للبنت نفسها ..

لكن وش اقول ،، عقول تفكيرها محدود ،، وحظها مقرود !!

يعطيك العافية غيود على هالقصة الغريبة فعلا ...

وقولي آمين ،، الله يرزقك وباقي البنات اسد بن اسد يعجبكم وتحبونه و يمشيكم على عجين ما تلخبطونه ، ولا ياخذكم خروف تمشونه على قرونه ويحقر نفسه وتحقرونه ..

19-08-2009, 11:38 PM

يا مساء الخير غيود

وربى اول ما شفت العنوان قلت

لازم اشوف ايش موضوع الخروف

الله يهديها منيره

وانا مع اخى عسيب فى كل ماقاله

لا اتمنى ان اتزوج خروف لانها ستكون عيشه مقرفه

رغم انه سيكون مطيع لكل اوامرى ولكنى سأمل بعد

منه ومن نفسى

احمد ربى انى وجدت حصان

ولكنه فى اغلب الاوقات اسد ابن اسد على قولة عسيب

وكما قال عسيب ايضا

ربنا يرزق كل البنات بأسد

دمتم بسعاده لا تفنى

20-08-2009, 07:32 AM

منيروووووه هين بس خروووف مالتوووووه عليكِ

يقول السباعي حكمة اعجبتني بأن المرأة لاتحب الرجل الهش بل الذي يقو في أحايين لا حتى تشعر برجولته!

وحقيقة أسمع من سوالف الحريم احيانا إنه في نوعيات مثل منيروووه تحب واحد تقوده على كيفها يعني (بالعامية

المعقدة مدردر اسعد) يعني مايدري وين ربه وظيفته ديناميكية جيب هات ودين فقط

الحياة الزوجية مركبة وزورق يتشارك فيها الزوجين يتقاسموا رغيف الحكمة والتخطيط والمشورة الزوج يكون المهيمن

بإرادته النضالية ونظرته الثاقبه يزن الأمور يقدرها قدرها ذات تفاعلية تكاملية مع الشريك الآخر ...

اما الخرووف هي الندمانة بكره الناس تنظر لها زوج الخبل ههه صحيح بجد يابشر اعرف نوعيات كذا

اللي بتطيح بايدي امها داعية لها غير تبوس ايدها والارض اللي امش عليها:Taj23:

اما سوالفكن غيوود معروووفه من يجلسن بالزواج وفلان الوسيم يارب اتزوجه ووو

(((غيوووووووود ردك قوي لما قلتي لها اخاف يجي واحد ذيب يفترسك انتي وخروفك:0091:

اهنيك على رجاحة عقلك استاذة غيداء وسرعة بديهتك)

موضوع جميل غيوود وسلمت يمينك يافاضلة...

20-08-2009, 01:23 PM

,
,

الله يعينها صديقتك منيرة ياغيداء .. !!

لأنه بصراحة ماأعتقد إن فيه بنت عاقلة تفكر جدياً في الإرتباط برجل _ خروف _ ضعيف شخصيّة

لآ يهش ولآ ينش على قولتهم .. !!

حياتها راح تكون كئيبة , مملة , وماراح تحس بالسعادة أبد ..

المرأة مهما كانت شخصيتها .. تتمنى الإرتباط برجل بمعنى الكلمة ..

قادر على إحتوائها وحمايتها و رعايتها .. رجل هو الملاذ و السكن و الوطن ..

وهالصفات ماراح تتوفر في الرجل _ الخروف _ بأي حال من الأحوال ..

.
.

أتفق مع ( عسيب ) في كل ماقاله .. إلا في مسألة ( يحكمها ) :a28: لأنه برأيي العلاقة بين

الزوج و زوجته ماتقوم على الأمر و النهي ومن يحكم من ..

العلاقة الرائعة هذي أساسها المساواة في كل شيء وإن كانت القوامة للرجل ..

ومتى ماتوفر الإحترام و التقدير بين الطرفين راح تختفي علاقة الحاكم والمحكوم ..

و الموووووووهم على قولتك غيودة ..

إن الرجل الخروف آخر واحد تفكر فيه الأنثى أو المرأة الواعية العاقلة الناضجة ,,

.
.

محبتي لكِ يالغلا :4610: